பெரம்பலூர் & குன்னம் சட்டமன்ற தொகுதிகளுக்கான வாக்காளர் பட்டியல் வெளியீடு!

பெரம்பலூர் மாவட்டத்தில் உள்ள இரண்டு சட்டமன்ற தொகுதிகளிலும் 4,95,153 வாக்காளர்கள் உள்ளனர் - மாவட்ட ஆட்சித்தலைவர் டாக்டர்.தரேஸ் அஹமது இ.ஆ.ப., அவர்கள் தகவல்

இந்திய தேர்தல் ஆணையத்தின் உத்தரவின்படி பெரம்பலூர் (147) மற்றும் குன்னம் (148) சட்டமன்ற தொகுதிகளுக்கான வாக்காளர்  பட்டியல் வெளியீட்டு நிகழ்ச்சி  மாவட்ட ஆட்சியர் அலுவலக கூட்ட அரங்கில் இன்று (10.01.2014) நடைபெற்றது. இந்நிகழ்ச்சியில் வாக்காளர் பட்டியலை  மாவட்ட ஆட்சித்தலைவர் டாக்டர்.தரேஸ் அஹமது இ.ஆ.ப., அவர்கள் முன்னிலையில் வாக்காளர் பதிவு அலுவலரும்  மற்றும் பெரம்பலூர் சார் ஆட்சியருமான திரு.மதுசூதன் ரெட்டி இ.ஆ.ப., அவர்கள் வெளியிட்டார்.

அதன் பிறகு மாவட்ட ஆட்சித்தலைவர் செய்தியாளர்களிடம் பேசியதாவது:

பெரம்பலூர் மாவட்டத்தில் 01.10.2013 அன்று வெளியிடப்பட்ட வரைவு வாக்காளர் பட்டியலில் பெரம்பலூர் சட்டமன்ற தொகுதியில் 2,50,143 வாக்காளர்களும், குன்னம் சட்டமன்ற தொகுதியில் 2,33,441 வாக்காளர்களும் ஆக மொத்தம் 4,83,584 வாக்காளர்கள் இடம்பெற்றிருந்தனர்.

01.10.2013 முதல் 31.10.2013 வரை பெறப்பட்ட வாக்காளர் படடியலில் பெயர் சேர்த்தல் படிவங்களின் பேரில் 18,030 வாக்காளர்கள் புதிதாக சேர்க்கப்பட்டுள்ளனர். இதில் 8932 பேர் ஆண்கள் 9090 பேர் பெண்கள் 8 பேர் இதரர். வாக்காளர்கள் இறப்பு உள்ளிட்ட காரணங்களுக்காக 6461 பேர் நீக்கப்பட்டுள்ளனர்.

தற்போது வெளியிடப்பட்டுள்ள வாக்காளர் பட்டியலின்படி பெரம்பலூர் சட்டமன்ற தொகுதியில் உள்ள 297 வாக்குசாவடிகளில் மொத்தம் 2,56,851 வாக்காளர்கள் உள்ளனர். இதில் 1,26,226 நபர்கள் ஆண்கள், 1,30,615 நபர்கள் பெண்கள். 10 பேர் இதரர். அதேப்போல குன்னம் சட்டமன்ற தொகுதியில் உள்ள 293 வாக்குசாவடிகளில் மொத்தம் 2,38,302 வாக்காளர்கள் உள்ளனர். இதில் 1,18,982 நபர்கள் ஆண்கள், 1,19,305 நபர்கள் பெண்கள். 15 பேர் இதரர்.

ஆக மொத்தம் பெரம்பலூர் மாவட்டத்திலுள்ள பெரம்பலூர் மற்றும் குன்னம் சட்டமன்ற தொகுதிகளில் 4,95,153 வாக்காளர்கள் உள்ளனர். இதில் 2,45,208 நபர்கள் ஆண்கள், 2,49,920 நபர்கள் பெண்கள்  இதரர் 25 நபர்கள் உள்ளனர். மேலும் வாக்காளர் பட்டியலை வருவாய் கோட்டாட்சியர் அலுவலகம், வட்டாட்சியர் அலுவலகம் மற்றும் கிராமங்களில் நியமிக்கப்பட்டுள்ள வாக்குசாவடி நியமன அலுவலர்களிடம் பார்த்துக்கொள்ளலாம்.

இவ்வாறு தெரிவித்தார்.

இந்நிகழ்ச்சியில் மாவட்ட வருவாய் அலுவலர் திரு.எம்.ஏ.சுப்பிரமணியன், சார் ஆட்சியர் மதுசூதன் ரெட்டி இ.ஆ.ப.,  மாவட்ட ஆட்சியரின் நேர்முக உதவியாளர் (பொது) திரு.மலையாளம், மாவட்ட வழங்கல் அலுவலர் திரு. ராஜேந்திரன், பெரம்பலூர் வட்டாட்சியர் திரு.ரெங்கராஜீ மற்றும் அங்கீகரிக்கப்பட்ட அரசியல் பிரதிநிதிகள் பலர் கலந்து கொண்டனர்.